今時今日的咖啡店其實單靠靚咖啡靚蛋糕真係唔夠的,環境裝修和店面氣氛,以至擺設、裝飾等等同樣重要,皆因在相機食先的年代,打卡影相真係好緊要,好似曼谷 Thonglor 這間 The Blooming Gallery 就係一個例子。
位於 Thonglor 的 The Blooming Gallery 雖然不近 BTS,步行的話都要接近15分鐘,但係依然吸引不少本地人來打卡呃 like。
乾花、盤景植物、紅磚牆等這類型元素都算係今日成為一間打卡網紅店的必要條件之一,而 The Blooming Gallery 就有齊上述三種,加上仿玻璃屋的設計,又帶點自然光滲入店內,更是十分適合影相。
食物方面,有不少女士們相當喜愛的甜品糕點,其中招牌是超多抹茶粉的蛋糕,店員會在你面前灑上抹茶粉,口味十分清爽。
另一道叫做 The Blooming Garden 盛開的花園,擺盤賣相十分一個精緻的花園模型,其實是朱古力蛋糕和雪糕,也是有噱頭很適合影相的食物。
想食飽一點也有意粉等供應,茶飲方面有多款紅茶花茶提供,亦都芳香十足。至於消費又貴不貴呢?這裡是 Thonglor 區當然不是地道草根,價錢不算超離地,但這樣的環境陳設也是合理的。
可惜就是不近 BTS 站,地點在 Grande Centre Point Sukhumvit 55 前面,即是酒店 akyra Thonglor Bangkok 同商場 Eight Thonglor 的樓下。