去泰國做 Spa 相信大家都經驗豐富，有各大小 spa 店按摩店任君選擇，豐儉由人，奔波旅程中放鬆 relax 下，忘記工作壓力和煩惱，簡直快活過神仙！之但係去醫院做 spa 你又試過未？

可能你都聞所未聞，原來在泰國曼谷最大的醫院 Siriraj Hospital 內，竟然有間 spa 水療中心。而且遊客都可以去做 treatment，相當特別。

話說這裡其實是醫院的泰式傳統診療中心，名為 Ayurveda Clinic，醫院方面是想利用泰國傳統的醫藥和按摩方式，去協助民眾調理好身體。遊客亦可以光顧，如果你加入會員更可免去25%附加費，記得帶齊護照證件就可以登記。

最特別的是按摩並不是普通泰式按摩，而係指壓按，兼且係由專業醫師幫你做！無錯，係醫師，皆因他們同時兼具醫生和按摩師資格，屬於醫院內的正規部門，懂得傳統藥理，亦懂得按摩治療。而且說到尾都是醫院標準，光顧之前醫師都會同你量血壓，假如你血壓高，他們有機會會拒絕你做水療，免生意外，安全標準做得十分足。

可能有人會覺得，到醫院意頭唔好，仲要做 spa？但係其實環境一點也不像醫院，treatment 房內設備齊全，裝修同一般按摩店無異，有沖涼房有浴缸有按摩床。房內落地玻璃，窗外風景優美，唔講人地分分鐘以為係酒店！有許多本地人都時常來，又有些朋友係病患家屬，在探病空餘時間來放鬆一下。

醫院始終屬於政府地方，clinic 內的醫師或員工都可用基本英語溝通，但畢竟不是私人營運的按摩店，大家也不需期望他們服務像坊間一樣做到五星級。如果要去的話可以直接搭的士但有點遠，又或者可以在 Saphan Taksin 碼頭坐船去到 Thonburi Train Station，碼頭一上就是這間醫院了。

座標：13.7604766,100.4846595